انا مش هكتب حاجة فى التدوينة دى بقلمى لكن ملقتش حاجة احسن من اشعار مصطفى ابراهيم ابدا بيها يارب تعجبكم
مين فينا عارفك يارب
ومين فينا لأ
مين اللى فينا لو قال بحبك
قالها بحق
واحد بدقن
بيقول حلال ويقول حرام
ولا فواعلى أرزقى شادد الحزام
ولا خمورجى أستسمحك قبل أما نام
ولا عيل لسه معرفش الكلام
ولا حاطلع أنا عارفك
أنا اللى تايه فى الزحام
------------------------------------------
الجاى مش أد اللى راح
ولا اللى جاى أكتر؟
الشاش على أد الجراح
ولا الجراح أكبر؟
------------------------------------------
طول عمره يحايلك
ونفسه أسمه
ييجى فى رسايلك
وتبعتيله تطمنيه إن أنتى عارفه
إن أنتى ليه
وإن أنتى قايمه ونايمه بيه
وقت الشتا يتدفى بيكى
ووقت الخطر تتحامى فيه
--------------------------------------------
بعد طرحك م الحساب
للعساكر والكلاب
والارانب
والفيران
والاجانب
والغيلان
والارايل
والقرون
والمرايل
والدقون
اللى فاضل يا أفاضل
هو دا تعداد وحصر
للعيال اللى جابتهم
ف الحلال الست مصر
--------------------------------------
ندرت الندر بالساهل
وكفرنى عشان أوفيه
لا كان الندر يستاهل
ولا كفرى نفع بعديه
---------------------------------------
كل أما نتألم
من شئ بيجرحنا
نشطب عشان نرتاح
بالجاف مكان الجرح
لافيه توبه تمحى جراح
ولا حزن ننساه بفرح
والدنيا جمع وبس
مفهاش علامه طرح
---------------------------------------
أنا مش فاكر
أخر مره بكيت كانت أمتى
أنا مش فاكر
أخر دمعه عليها القيمه
أنا مبقتش بصدق ولا مشهد ف الدنيا
أنا مبقتش بدمع غير .... وأنا جوا السيما
----------------------------------------------
الشرخ الاول دايما
اللى هيظهر فى مرايتك
هيجر الباقى وراه
والفتله الفاضله فى ياقتك
هتبهدل بالطو سياتك
وتكره لحد قفاه
--------------------------------------
فى حاجات لازم علشان نعرف
درجه قوتها بنكسرها
وحاجات ف ايدينا
عشان نعرف
إننا عايزينها ...بنخسرها
كدبت ف عمرك كام صاحب
علشان كان نفسك تتطمن؟
وخسرت أصحابك وأتطمنت
طب كام بالون فرقعوا منك
وأنت بتنفخهم ع الاخر
وعرفت أخرهم بس ندمت
دلوقتى فهمت
أنا عاوز أيه
ونا كنت بفرقع بلالين ليه
أنا عاوز حاجه بدون آخر
------------------------------------------
لو دامت ف ايد غيرك
مكنتش وصلتك
حصلت ل ميت واحد
زى ما حصلتلك
علشان كده بزعل
لاكن مبتأزمش
وساعات كتير بفرح
لاكن ما بتعشمش
--------------------------------------------
طلعوا كل الطبايع
والصفات الممكنه
وارسمونى بفرشه تايهه
تطلع الصوره الغريبه
لحد أصلا مش هنا
-----------------------------------------
لأول مره نفسى الباص ما يوصلشى
وأول مره نفسى الناس
متستعجلشى فى السواق
الفرحه تمللى معايا ليه متكملشى
وتمللى أسيبك ليه ياست الناس
ونا مشتاق؟
-----------------------------------------
لوح البنور الصافى
الرايق زى الميه
كان أجمل جايز لاكن
الاجمل دايما هش
علشان كدا لما إتجرح
كان عارف إن الدنيا
بتبدل نعمه بتانيه
وخلته ميخافش الخدش
--------------------------------------
الدنيا أساسا م الاول
شئ يشبه سلك الشماعه
بيتلعبك منك ف ثوانى
وعشان يرجع مفرود تانى
لازم تتعذب وتعانى
وتفكه ف أكتر من ساعه
---------------------------------------
بدون م أعرف سبب واضح
عشان أزعل
أنا زعلان
وفجأه بدون سبب برضه
يفرحنى
بكون فرحان
لامنى عرفت أعمل إيه
عشان مزعلش من تانى
ولا منى عرفت إزاى
أدوق الفرحه بالمجان
----------------------------------------
للأسف من صغر سنى
علتى بزهق قوام
ابتدى واسخن لكنى
بعد فتره أبرد وأنام
كله فى الاول بميل له
وكله فى الاخر بمله
حتى لو كان شئ فاضله
خطوه واحده ع الختام
--------------------------------
عيشوا المشاهد
كل مشهد
زى ما يكون الاخير
واشبعوا ساعه الوداع
وأحضنوا الحاجه بضمير
دا اللى فاضل مش كتير
اللى فاضل مش كتير
(مصطفى إبراهيم)
